To Mr. M'Adam, Of Craigen-Gillan. Sir, o'er a gill I gat your card,
I trow it made me proud;
See wha tak's notice o' the bard
I lap and cry'd fu' loud.

Now deil-ma-care about their jaw,
The senseless, gawky million:
I'll cock my nose aboon them a'
I'm roos'd by Craigen-Gillan!

'Twas noble, Sir; 'twas like yoursel',
To grant your high protection:
A great man's smile, ye ken fu' well,
Is ay a blest infection.

Tho' by his[1] banes who in a tub
Match'd Macedonian Sandy!
On my ain legs thro' dirt and dub,
I independent stand ay.

And when those legs to gude, warm kail,
Wi' welcome canna bear me;
A lee dyke-side, a sybow-tail,
And barley-scone shall cheer me.

Heaven spare you lang to kiss the breath
O' many flow'ry simmers!
And bless your bonnie lasses baith,
I'm tauld they're loosome kimmers!

And GOD bless young Dunaskin's laird,
The blossom of our gentry!
And may he wear an auld man's beard,
A credit to his country.

To Mr. M'Adam, Of Craigen-Gillan. by Robert Burns